Astrabuduko Talde Feminista: “Sonora diskotekan eta inguruetan emakumeenganako erasoak gertatzeko arriskua dago”

Ertzaintza Sonora inguruetan / © Segurtasun Saila

Dozenaka lagunek Sonora dantzalekuaren kontrako protesta egin zuten azaroaren 29an, Astrabuduko Auzokideen Elkarteak deituta. Diskotekak eragiten omen dituen arazoen aurrean, Erandioko Udalaren "utzikeria eta gaitasunik eza" salatu zituzten. 

“Altzari publikoak hondatzea, gizalegearen kontrako jokabideak, ordu txikietara arteko gehiegizko zarata eta segurtasunik eza" eragiten omen ditu Sonorak. 

Baina, Astrabuduko Talde Feministak emakumeentzat suposatzen duen arriskuaz ohartarazi gura izan du. 

Bitartean, horiek saihesteko, polizia gehiago jartzea nahikoa dela uste dute Erandioko Udalak eta Segurtasun Sailak.

Bizarra Lepoan: “Euskaldun guztion hizkuntza-eskubideak bermatuak izan arte, oldarraldiei aurre egiten jarraituko dugu”

 

 Bideoa: © Bizarra Lepoan euskara elkartea

"Oztopoak oztopo, euskaraz bizi Getxon!" lelopean, Bizarra Lepoan euskara elkarteak gure hizkuntzaren kontrako (k)oldarraldia, eguneroko trabak eta erabaki politiko atzerakoiak salatu zituen abenduaren 1ean, Algortako Portu Zaharrean egindako performance-ekintza baten bidez. Izan ere, besteak beste, hamar udaltzain-lanpostu berri sortzea erabaki du Getxoko Udalako. Eta horietarik bostei ez zaie euskara jakitea eskatuko. 

Agatha Libano Alonso (Silviaren abokatua): “Erakunde bakar batek ere ez dio barkamenik eskatu Silviari, kalbario judizial honen ostean”

Azaroaren 25ean Bilboko epaitegien aurrean egindako kontzentrazioa / © Ecuador Etxea

SOS Arrazakeriak eta Silvia No Estás Sola eragileak joan den astelehenean salatu zutenez, 2018ko maiatzean Neguriko ertzain-etxean jipoitutako emakume arrazializatu horren auzia itxita geratu da, ofiziozko prokuradoreari Espainiako Auzitegi Gorenean aurkeztu gura zuten helegitea aurkeztea “ahaztu” zaiolako, Agatha Libano Alonso abokatuak errekurtsoa zehatz-mehatz prestatu eta garaiz helarazi zion arren. Epaiketan zigor arinak ezarri zizkioten ertzain bati, baina emakumea ere zigortu zuten isuna ezarriz, desobedientzia leporatuta. Aurten, Silviak Auzitegi Gorenera jotzeko asmoa zuen, bere errugabetasuna frogatzeko eta agenteak zigor gogorragoa jasotzea eskatzeko. Ez da posible izango. 

Uribe Kostako EHE: “Euskararen aldeko borroka lehen lerrora eraman nahi dugu”

© Uribe Kostako EHE

“Euskaraz bizitzeko, Euskararen Errepublika” lelopean, abenduaren 7rako nazio-manifestazioa deitu du EHE-Euskal Herrian Euskarazek. Hitzodua 18:00etan ipini dute Durangoko Landako Gunean, ohi den legez, bertan Liburu eta Disko Azoka egiten ari direla aprobetxatuz. Bada, mobilizazio horren berri emateko asmoz, aurkezpena egingo du azaroaren Uribe Kostako EHEk, 19:30ean, Algortako Azebarri kultur elkartean. Bide batez, taldea bera ezagutzera emateko baliatuko dute ekitaldia.

 

Algortako Julio Caro Baroja BHI "ikastetxe elitista eta ingelesa" bilakatzeko asmoa gaitzetsi dute bertoko irakasle euskaltzaleek

Algortako Julio Caro Baroja BHIko irakasle euskaltzaleek zehaztu dutenez, hezkuntza-zentroa "ikastetxe elitista eta ingelesa" bihurtzeko "zuzendariaren eta haren taldetxoaren maniobra" EAEko Aldizkari Ofizialean azaroaren 8an argitaratutako Eusko Jaurlaritzaren Hezkuntza Sailaren aginduagaz (pdf) lotura zuzena dauka, "aurretik prestatzen ibili diren arren". Egitasmoa institutuko Eleaniztasun eta Berrikuntza Batzordeetan aurkeztu zuten herenegun eta hilaren 19an Batzorde Pedagogikora eramango dute.

Batxilergo ia osoa ingelesez ipini gura dute Algortako Julio Caro Baroja institutuan

© Julio Caro Baroja BHI

D eta A ereduak kenduta, Algortako Julio Caro Baroja BHI ikastetzea Nazioarteko Batxilergora aldatu gura ei dute, hau da, ikasgai ia guztiak ingelesez eskaintzera; besteak beste, euskararen kalterako. GGEBE Gizabanakoen eta Gizarte Eskubideen Aldeko Elkarteak Lantzean Behin | Uribe Kostako komunikazio-egitasmoari jakinarazi dionez, Egitasmoa institutuko Eleaniztasun eta Berrikuntza Batzordeetan aurkeztu zuten herenegun eta hilaren 19an Batzorde Pedagogikora eramango dute. "Helburua oso garbi esan zuten: Neguriko eta goi-maila sozioekonomikoa duten inguruetako ikasleak erakartzea", salatu dute GGEBEkoek.

 

Gaur 21 urte egingo lituzke Ukberri.net agerkariak

 

Gaur bete dira 21 urte Ukberri.net agerkari digitala jaio zela, Auzitegi Nazionalak itxitako "Euskaldunon Egunkaria"ren "Bizkaia" gehigarriak eskualdean utzitako hutsunea betetzeko saiakera gisa. 2003ko azaroaren 8an hasita, Uribe Kostako kaleetan gertatutako hamaika borroken lekuko izan zen, 11 urte luzez, eta horiek denak sareetara eroan zituen. 2014ko abenduan eman zuen amaitutzat bere jarduna, "UK" aldizkariko kideakaz eta euskalgintzako eragileakaz batera, Hiruka Komunikazio Taldea sortu ostean.

 

Atxuriko auzipetuen laguntza-taldea: “Auzora gorroto-mezuak ekartzen dituztenei elkarbizitzarekin eta elkartasunarekin erantzungo diegu”

© Naiz.eus

Azaroaren 18tik 20ra bitartean bederatzi pertsona epaituko dituzte, duela bost urte, 2019ko azaroaren 6an, Bilboko Atxuriko plazan Voxek antolatutako ekitaldiaren aurrean protesta egiteagatik. Gorroto-delitua leporatzen diete eta, besteak beste, alderdi faxistak 4 urtetik 8 urtera bitarteko kartzela-zigorrak eta isun handiak eskatzen ditu auzipetuentzat. Horren aurrean, elkartasun-ekitaldia egingo dute gaur, 19:00etatik aurrera, Atxuriko plazan. Horren guzti horren xehetasunak eman dizkigu Luix auzipetuen laguntza-taldeko kideak. 

Urduliz Palestinarekin Bat: “Gobernuek beste leku batera begiratzen dute, genozidioa behingoz gelditu beharrean”

Urriaren 21ean, Gernika-Palestina herri-ekimenak deituta, kontzentrazioa egin zuten Urdulizen / cc-by-sa Hiruka

Eguazten honetarako, azaroaren 6rako, bere lehendabiziko ekitaldia antolatu du sortu berri duten Urduliz Palestinarekin Bat taldeak. “Genozidioaren aurrean bertako alternatibak” lelopeko berbaldia egingo dute, 19:00etan, Urdulizko kultur etxean. Eta horri buruz jarduteko, Palestinarekiko Erantzukizuna taldeko lagunak gonbidatu dituzte. 

 

Anton Fernandezen eta Josu Muruetaren hilketak gogoratzen jarraitzearen beharraz ohartarazi dute

© Sare Antifaxista

Aurreko urteetan egin legez, dozenaka herritar batu da gaur, 1969ko kutsaduraren kontrako mobilizazioen testuinguruan, Francoren poliziak tiroz hildako Josu Murueta astrabuduarra eta Anton Fernandez altzagarra gogoratzeko. Aurten 55 beteko dira gertaera horietatik eta, Astrabuduko Josu Murueta plazan egindako ekitaldian, Erandioko Oroimena herri-ekimenka “ezinbestekotzat” jo du oroitzapen-ariketa horregaz segitzea, gertaerok “ahanzturan eror ez daitezen”. Azpimarratu dutenez, hilketa horiengatik “inortxok ere ez zuen erantzukizunik hartu edo azalpenik eman”. Bada, modu ezberdinetan, urte hauetan denetan kutsadura zein Josuren eta Antonen erailketak salatu dituzten pertsona eta taldeak gogoratu gura izan dituzte gaur: Txetxu Aurrekoetxea, Josu Cerrato, Ana Krespo... eta abar luze bat. Halaber aipamen berezia izan dute, Josunerentzat, duela gutxi zendu zen Pili Arenza eta Josu Muruetaren alabarentzat, bere amagaz eta Idoia ahizpagaz batera, urte luzez familiarentzat justizia eskatzen ibili zena. 

Badator 25. Indabada! Aurten indaba-txapelketa ere egingo dute

© Algortako Indabada

Mende laurdena egingo du aurten Algortako Indabadak, eta zalantza barik hori posiblea izan da pertsona eta belaunaldi askoren lanari eta inplikazioari esker. Hori guztia ospatzeko aukera egongo da aurtengo hitzorduan, urriaren 26an, "Uzta jasotzeko garaia" lelopean. Aurtengo Indabadari dagokionez, formatu bikoitza probatuko dute lehendabiziko aldiz. Alde batetik, ohiko indaba-jana eta egitaraua egongo da, Algortako Txiki-Otaegi plazan. Bestetik, eta aurtengo berrikuntza gisa, Indabada Txapelketa antolatu dute izena ematen duten koadrillen artean, Biotz Alai plazan, bigarren gune bat sortuz Indabada Egunean ahalik eta lagun eta belaunaldi gehien egunaren parte izateko. 

Ertzaintzak faxistak babestu eta antifaxistak erasotu ditu urriaren 12an Bilbon

Zaurituetako bat / © Alerta Gorria irratia

Gutxienez zortzi lagun identifikatu eta bi zauritu ditu, eta beste bat atxilotu du Ertzaintzak, Erresistentzia Antifaxistak Bilbon deitutako manifestazioaren bukaeran. Sare Antifaxistak eta Ecuador Etxeak baieztatu dutenez, polizia autonomikoak Espainiako Gobernuko ordezkaritzaren aurrean batutako falangista talde bat babestu eta antifaxistak erasotu ditu. 

 

Areetako taberna bateko langileek jasandako lan-esplotazioa eta sexu-abusuak salatu dituzte

Espainiako Poliziak hiru pertsona atxilotu zituen eguenean Areetako metro-geltoki ondoko taberna batean hainbat emakume lan-kontratu barik behin eta berriz enplegatzea eta abusuzko lan-baldintzak ezartzea leporatuta. Gainera, establezimenduaren jabeari sexu-eraso delituak ere egotzi dizkiote. Hala, dozenaka lagunek egin zuten kontzentrazioa atzo, Xake plazan, Eskumaldeko LABek eta Itzubaltzetako Talde Feministak deituta. Gaur goizean, berriz, leihoak margoz beteta agertu da taberna. Dirudienez, oraindino zabalik daukate.

Lamiako Txopoeta Bizirik: “Administrazio publikoen utzikeriaren, abandonuaren eta interesik ezaren ondorioa dira gure aldarrikapenak”

Egindako mobilizazio baten artxiboko irudia / © Lamiako Txokoeta Bizirik

Ia urte bi daroatzate euren auzoak duinak izateko beharrezkoak diren aldaketak eskatzen Lamiako Txopoeta Bizirik taldeko kideak. Metroa erabat lurperatzea, Lamiakoko ibarra berreskuratzea, ekipamenduak eta beharrizanei araberako hirigintza jasangarria aldarrikatzeko asmoz, hamaika ekimen egin dituzte. Euren ustez, Leioako Udalarena da ardura nagusia: “Beharrezkoa bada, beste erakunde batzuekin esku-hartzeko mekanismoak abian jar ditzala, berandu baino lehen”. 

Erresistentzia Antifaxista: “Gutxieneko adostasun-puntu batzuen inguruan, indarrak batu nahi ditugu urriaren 12ko manifestazioan”

Urriaren 12a Espainiar Estatuak darabilen “inposizio kultural, ekonomiko, politiko eta militar bortitza” irudikatzen duen data adierazgarria da, Erresistentzia Antifaxistaren ustez. Horregatik, zapatu honetan, Bilboko Indautxu plazatik 12:00etan abiatuko den manifestazioan parte hartzera gonbidatu ditu antifaxista denak: libertarioak, abertzaleak, komunistak, anarkistak, antiinperialistak, kolektiboak eta erakundeak, gazte asanbladak, gaztetxeak... “Amankomuneko bideak bilatu eta jarrera hartzeko garaia” dela uste dute. Erresistentzia Antifaxistak aldarrikatu duenez, “batu gaitezen, kaleak har ditzagun, garaipenera arte!”. 

Josu Muruetaren eta Anton Fernandezen hilketen 55. urteurrena gogoratuko dute urriaren 27an Astrabuduan

Josu eta Anton gogoratzeko horma-irudia Altzagan,

Aurten 55 beteko dira Francoren poliziak Josu Murueta astrabuduarra eta Anton Fernandez altzagarra tiroz hil zituela, 1969ko kutsaduraren kontrako mobilizazioen testuinguruan. Hala, Erandioko Oroimena herri-ekimenak herritar biak gogoratzeko ekitaldia egingo du urriaren 27an (domekan), 13:00etan, Astrabuduko Josu Murueta plazan. Horrez gainera, Erandion memoria historikoa landu zuten eta dagoeneko gure artean ez dauden Txetxu Aurrekoetxeari, Ana Isabel Crespori eta Josu Cerratori omenaldia egingo diete; baita uztailean zendu zen Josu Muruetaren alaba Josuneri ere.

Uxue Lakasta (ikasle-asanbladako kidea): “Orain arte eskolarik ez ematea lortu badugu ere, irasle faxista EHUtik kanpora dezatela nahi dugu”

 © Leioatik! Leioako campuseko proiektu komunikatiboa

Leioako campuseko Zuzenbide Fakultatea bete zuten astelehenean ikasleek bertoko irakasle “faxista” kanporatzeko exijitzeko eta auzi honetan EHU izaten ari den jarrera salatzeko. Sare sozialetan “jarrera erreakzionarioak” erakutsi ditu Lan Zuzenbideko irakasleak. “Izaera ultraeskuindarreko eta arrazistako” adierazpenak partekatu ditu, X plataformaren bitartez, mezu matxistak eta homofoboak tartean. Protestei buruzko xehetasunak eman dizkigu Uxue Lakasta auzi honi aurre egiteko sortutako ikasle-asanbladako kideak. 

Irakasle “faxista” Zuzenbide Fakultatetik kanpo gura dute ikasleek

© Leioatik! Leioako campuseko proiektu komunikatiboa

Zuzenbide Fakultateko irakasle “faxistaren” kaleratzea exijitzeko mobilizatu dira gaur ikasleak. Leioatik! Leioako campuseko proiektu komunikatiboak zehaztu duenez, ikastegi barruan egindako eserialdian, aurreikusita zegoen eskola etetea lortu dute, “Faxistak kanpora” lelopean. Sare sozialetan “jarrera erreakzionarioak” erakutsi ditu Lan Zuzenbideko irakasle horrek. “Izaera ultraeskuindarreko eta arrazistako” adierazpenak partekatu ditu, X plataformaren bitartez, mezu matxistak eta homofoboak tartean. Hainbat iturrien arabera, gaurko ekintza Ernaik hartu du beregain, eta EHUk gertatutakoa gaitzetsi du. 

Sopelako Udalak herriko kolektiboekiko “mespretxua” erakutsi duela salatu du Txosna Batzordeak

Sopelako Txosna Batzordearen gaurko prentsaurrekoa.

Larrabasterrako txosnei fidantzaren dirua kendu izanaren inguruan, Sopelako Udalak prentsara zabaldutako oharrean esandakoak gezurtatu gura izan ditu Txosna Batzordeak, ostegun honetan egindako prentsaurrekoan. Eragileak adierazi duenez, “akatsez beteta” dagoen Udaltzaingoaren txostenean oinarritu da tokiko erakundea erabakia hartzeko, gertatutakoak eurekaz kontrastatu barik. Ustez, Jaietako Ordenantza urratu izanaz ari da txostena. Aldebakartasun hori da Txosna Batzordearen haserrea piztu duena: “Arazoa ez da fidantzaren dirua ez berreskuratzea, Udalak herriko kolektiboekiko izan duen mespretxua baizik. Udalak oso erraz ekidin zezakeen egoera hau. Lehendabizi, gurekin kontrastatuz, fidantza ez itzultzeko erabakia partekatuz; eta, gerora, akatsez betetako prozedurari bukaera emanez”, adierazi dutenez. 

Gudari Eguna 2024. Gogoan zaituztegu!

Pankarta eskualdean egongo den mobilizazioetako bat iragartzen.

Erregimen frankistak fusilatu eta 49 urtera, ETA erakunde armatuko kide izandako Juan Paredes Manot "Txiki" zarauztarra eta Anjel Otaegi Etxebarria azpeitiarra gogoratuko ditu irailaren 27ko (barikua) Gudari Egunak. Jose Luis Sanchez Bravo, Ramon Garcia Sanz eta Humberto Baena FRAPeko kideakaz batera erail zituzten. Haiek eta bidean geratu diren lagunak gogoratzeko, mobilizazioak izango dira Euskal Herriko hainbat txokotan, baita Uribe Kosta eskualdean ere. Adi mobilizazioetara!

Liburu, Fanzine eta Material Politikoaren Azoka aste-akabuan Portugaleten

Irailaren 27tik 29ra bitartean, Liburu, Fanzine eta Material Politikoaren Azokaren seigarren edizioa egingo du Sare Antifaxistak, Portugaleteko merkatuan (Casilda Iturrizar kalea, 1); sarrera, doan. Hala, 43 kolektibok eta argitaletxek salgai ipiniko dituzte euren lanak. Horrez gainera, erakusketa, liburuen aurkezpenak, musika-emanaldiak...egongo dira. Besteak beste, Bernd Langer ekintzaile antifaxistaren “Antifaschistische Aktion. Geschichte einer linksradikalen Bewegung” (Ekintza antifaxista. Ezkerreko mugimendu erradikal baten historia) liburua aurkeztuko du espainolera itzuli duen Klaus Armbrusterrek. Baskale elkarteko kidea da bera, eta liburua Sare Antifaxistak plazaratu du aipatu elkarteagaz elkarlanean.

Egueneko udal batzarrean jarraituko du Irurak Bat etxearen eraisketaren gaineko eztabaidak

Irailaren 19an egin zuten Algortako Irurak Bat etxearen eraisketari buruzko Lurralde Batzordea / © Getxoko Udala

Getxoko Lurralde Batzordearen irailaren 19ko bilkuran ez zuen argibide handiegirik eman Alvaro Gonzalez (EAJ) Hirigintza zinegotziak. Lau orduz luzatu zen batzarrean, ia-ia Algortako Irurak Bat etxearen eraisketa-lanen berri ez zeukatela berriro esatera baino ez zen mugatu udal agintaria. Dirudienez, Gonzalezek adierazitakoak nahikoak izan ziren jelkideen gobernukide PSE-EErentzat. Batzarrera erretxinduta joan ziren. Baina, ordutik ez dute gaiari buruz ezer gehiago aipatu. Oposizioko alderdiek, ordea, “ez nahikotzat” jo zuten bilkura. Eguen honetako (hilak 26) udal batzarreko, presazko mozio bana aurkeztu dutela iragarri dute jada PPk eta Ahal Duguk.

Bizkaiko BDZ taldea: "Sionismoaren normalizazioaren aurka, Boikota Noari!"

Israeli boikot egitea eskatzeko manifestazioa Bilbon, artxiboko irudian / © Ecuador Etxea

Artikulu honen bidez, BDZ mugimenduak irailaren 24an Bilboko Guggenheimen egingo den ekitaldiari boikota egiteko deia egin nahi du publikoki. Bertan, Noa "artista" sionista ezagunak parte hartuko du. 

 

Israel egiten ari den genozidioaren testuinguruan, Gazan eta Zisjordanian ia 50.000 palestinar erail eta milioika desplazatu dituenean, ordezkari sionistei ahotsa ematea gizatasun eta errespetu falta handia iruditzen zaigu. 

 

Noa Bilbora etorriko zela jakin genuenean, BDZtik BBK Bilbao Kultura Social Forumen antolatzaileekin bildu ginen, gure desadostasuna adierazteko eta ekitaldia bertan behera uzteko eskatzeko. Ezezkoaren aurrean, idazki hau publiko egin behar dugu, eta adierazi Bilboko Udalaren eta Bizkaiko Foru Aldundiaren konplizitatea, sionismoaren normalizazioa eta zuriketa diru publikoarekin babesteagatik. 

 

Otsailaren 8an subflubialaren kontrako manifestazio handia egingo dute Bilbon

Gaurko kalejira Itzubaltzetan / © Subflubiala Ez!

Gaur eguerdian egin duten kalejiraren bitartez, bukatutzat eman dute Getxo eta Portugalete arteko itsasadar azpiko errepidearen kontrako kanpaldia. Zapatu eta domeka artean, lagun ugari batu da Itzubaltzeta/Romoko Artatza parkean egindako ekitaldietan eta Subflubiala Ez! plataformak horiei denei eskerrak gura izan dizikie, baita kanpaldia posible egin duten guztiei ere: txandalariei, musikariei, bertsolariei, ipuin-kontalariei... Antolatzaileen arabera, "arrakastatsua" izan da. Hala ere, hori bukatu izanak ez du esan gura subflubialaren kontrako borrokari amaiera emango diotenik. Otsailaren 8an ipini dute hitzordua: manifestazio "handia" egingo dute Bilbon.

Sexu-eraso berri baten aurrean, autodefentsa feministarako deia egin dute Sopelan

Sexu-erasoa salatzeko kontzentrazioa Sopelako udaletxe aurrean, artxiboko irudian / © Sugarri

Epaileak 35 urteko gizon bat espetxeratzeko agindua eman zuen martitzenean, abuztuaren 28an Sopelan izandako sexu-eraso baten egilea izatea leporatuta. Horren harira, adierazpen instituzionala plazaratu zuen eguaztenean Udalak. Sugarri neska* gazteen taldeak eta Sopelako Sare Feministak ere elkartasuna adierazi diete erasotutako emakumeari zein bere gertukoei, eta sexu-erasoa gaitzetsi dute, sare sozialen bitartez. Eragile feministak "nazkatuta" agertu dira eraso berri honen aurrean, eguneroko ogia direlako. Horiei aurre egiteko, autodefentsa feminista aldarrikatu dute.

Orain arte uriolak saihestu arren, itsasadarrak gainezka egiteko arriskua dago oraindino Altzagan

Babes Zibileko langileak eta udaltzainak zaintza lanetan Altzagan, uholde arriskuagatik / © Erandio Bizirik

Marea biziek ez dute uriolarik eragin momentuz Erandion Gaur itsasgora ez da aurreikusitakoa bezain bizia izan eta, horri esker, itsasadarrak ez du gainezka egin Altzagan, Erandio Bizirik elkarteak sare sozialetan nabarmendu duenez. Horregaz batera, udal-teknikariek izandako “begi ona” eta hartutako “erabakien egokitasuna” goraipatu dituzte bizilagunek. "Azpimarratu behar da, hasiera-hasieratik eskatu genuena betez, kaiko obra zakuekin eta harearekin itxi izanak eragotzi egin duela inguru horretatik errepidera ura ateratzea", azaldu dutenez. 

Irurak Bat etxearen eraisketari buruzko azalpenak eman beharko ditu bihar Getxoko Udalak

Carmen Diaz (PSE-EE) eta Amaia Agirre (EAJ) gobernu-hitzarmena izenpetzen / © Getxoko Udala

Getxoko Lurralde Batzordea batuko da eguen honetan 08:30ean, Neguriko Santa Klara jauregian. Batzarrean Algortako Irurak Bat etxearen eraisketaz berba egingo dute. Herritarrek sartzerik daukate. Eraikin horrekin gertatutakoak, besteak beste, desadostasunak sortu ditu udal gobernuko kide Getxoko EAJren eta PSE-EEren artean. 

Subflubialaren proiektua bertan behera uztea eskatuko dute aste-akabuan Artatzan kanpaldia eginez

Artatzan bertan egin dute kanpaldia iragartzeko prentsaurrekoa / © Sare Antifaxista

Bizkaiko Foru Aldundiak 2025ko udaberrian hasi gura ditu Getxo eta Portugalete arteko itsasadar azpiko errepidearen lanak. Subflubiala Ez! plataformak ohartarazi duenez, gutxienez 4 urte iraungo lituzkeen obra honek “kalte nabarmenak” eragingo lituzke. “Alde batetik, Artatza parkeko 3,5 hektarea inguru kaltetuko lirateke, bertako zuhaitz guztiak moztuz. Gainera, Artatza-Romo institutuko patioaren zati bat hartuko litzateke, eta zarata eta kutsadura (indusketak, kamioien trafikoa...) nabarmen handituko lirateke, ikasle zein zentroko langileei kalte oso nabarmenak eraginez. Ikastetxearen biziraupena bera ere zalantzatan jarri ahalko luke azpiegitura honek, matrikulazioak nabarmen jaitsiz. Inguruko bizilagunengan ere eragin negatibo nabarmenak izango ditu, baita Romo eskolan ere”, zehaztu dutenez. Hain zuzen ere, Artatza parkea bera aukeratu dute gaur arrastian herritar zein eragile ugari batu dituen prentsaurrekoa egiteko. Bertan egingo dute kanpaldia, zapatu eta domekan. 

Uriolen arriskuaren aurrean, harezko zakuei gogor eustea beste aukerarik ez diete utzi Altzagako auzokideei

© Erandio Bizirik

AZTI itsas-ikerketa zentroak iragarri duenez, itsasgora bereziki altuak espero dira martitzen honetatik barikura, arratsaldeko 5ak eta 8ak bitartean. Hala, arduratuta daude Altzagako itsasadar ondoko bizilagunak eta merkatariak. Izan ere, martxoaren 6an, itsasgora bizien ondorioz, itsasadarreko urak hartu zituen garajeak, lonjak, saltokiak eta tabernak. Ordutik hona, erakunde publikoek “sei hilabete daroatzate euren ardurei bizkarra ematen”, Erandio Bizirik auzokideen elkarteak salatu duenez. Denbora horretan guztian harezko zakuak baino ez dirltuzte jaso, Erandioko Udalak emanak. 

Jet pribatuak ere klima-aldaketaren arduradun direla salatu dute Sondikako aerodromoan

Hainbat bizikletari Sondikako tren geltokian elkartu ziren 12:30ean / © Jauzi Ekosoziala

Besteak beste, Algortako Telletxe plazatik abiatuta, Sondikako aerodromoan amaitu zen atzo Jauzi Ekosozialak antolatutako bizikleta-martxa, "jet pribatuen" kutsadura salatzeko helburuagaz. "Luxuaren aurrean nahikotasuna" lelopean, aerodromoan, jet pribatuen kanporatzea exijitu zuten manifestariek. Eguenean, Jauzi Ekosozialak, "turismoak pertsonengan eta ingurumenean duen eragina agerian uzteko", ekintza bat egin zuen Algortako Ereaga hondartzan, Bertan, eragile ekologistako ekintzaileek, eskuareen laguntzaz, ‘Turismo eredu honek hiltzen gaitu’ lelo adierazgarria idatzi zuten hondartzako harean.

Gure herriak harrera-leku bilakatzeko baliabide denak ipintzea eskatu diete Mankomunitateari eta Udalei

© Ecuador Etxea

Urtero legez, "Itsasoak dakarkiguna" performancea egin du gaur eguerdian Ongi Etorri Errefuziatuak (OEE) taldeak, Algortako Ereaga hondartzan. Gure hiriak eta herriak "harrera-lur" izatea gura du OEEk, gurera iristen direnek baldintza duinetan bizi daitezen, udal-errolda eskura dezaten, oinarrizko eskubideak bermatuta izan ditzaten, hala nola osasun-txartela, adingabeen eskolatzea, Lanbideko ikastaroak egiteko aukera edo oinarrizko gizarte-prestazioak. "Zuzenean eskatu nahi diegu gure udalei, Uribe Kostako Mankomunitateari, Bizkaiko Foru Aldundiari eta Eusko Jaurlaritzari, gizarte zibilarekin batera, behar diren baliabide guztiak jar ditzaten gure hiriak eta herriak harrera-leku eta bizikidetzaren eta inklusioaren benetako eredu izan daitezen, eta inor kalean utz ez dadin", esan dutenez. 

Lokutorio-grebari ekin diote gaur Zaballako espetxean dauzkaten eskualdeko lau preso politikok

Zaballako espetxera egindako martxa baten artxibo-irudia / cc-by Hala Bedi

Azken hilabetean lokutorioetan suertatu diren matxurak direla eta, pazientzia agortu zaie Arabako Zaballa espetxean dauzkaten 13 euskal preso politikori. Besteak beste, Aitor Cotano algortarrak eta Orkatz, Lexuri eta Irantzu Gallastegi berangoztarrek lokutorio-grebari ekitea erabaki dute. Kartzelako zuzendaritzak matxura denak behingoz konpondu arte protestan segitzeko asmoa daukate, bisitak baldintza duinetan egin ahal ditzaten.

Egungo turismo-eredu "jasanezina" salatu dute Algortako Ereaga hondartzan

 

© Jauzi Ekosoziala

Udako "turismo eredu neurrigabearen inpaktu kezkagarria" salatzeko asmoz, Jauzi Ekosoziala talde ekologistak protesta-ekintza egin zuen atzo, Algortako Ereaga hondartzan. Hala, "Turismo-eredu honek hiltzen gaitu" leloa idatzi zuten harean ekintzaileek. Hain zuzen ere, jarduera "eutsiezin" horren adibideak dira Getxoko Kirol Portura datozen bidaiarien ontziak eta, besteak beste, Algortako Portu Zaharrean biderkatu diren etxebizitza turistikoak. Bada, "Krisi ekosoziala ez doa oporretan" kanpainari segida emateko asmoz, zapatu honetan bertan, Sondikako aerodromora egingo dute bizikleta-martxa (ikusi kartela), jet pribatuek eragiten dituzten berotegi gasen isurketak salatzeko. Zutabeetako bat Algortatik bertatik aterako da: 11:00etan, Telletxe plazatik.

Irurak Bat etxearen eraisketak desadostasunak sortu ditu udal gobernuko kide Getxoko EAJren eta PSEren artean

Irurak Bat etxearen eraisketak utzitako orubea / © Getxoko EH Bildu

Ez dirudi Getxoko Udal Gobernuak osatzen duten alderdi bien arteko harremanak unerik gozoenak bizi dituztenik. Are gutxiago, EAJren udal bozeroalea eta beste zinegotzi jelkide bat babestutako Algortako Irurak Bat etxea baimen barik bota zuen Ereaga Atalaya kooperatibako kideak direla lau haizetara zabaldu ostean. Bertan, luxuzko etxebizitzak altxatu gura dituzte. Bada, EAJren gobernukide Getxoko PSE-EEk ez du begi onez hartu Udalak arrastiko azken orduan prentsa-oharra zabaldu izanagaz. PSEren ustez (espainolez), “azkarregi” doa EAJ, informazio hori zabalduta, “eraikina bota zuen enpresari zabaldutako espedientearen nondik norakoak oraindik azaldu ez” dizkiolako. Irailaren 19an izango den Lurralde Batzordearen “emaitzen” zain daude PSE-EEkoak. 

Aghata Libano (Silviaren abokatua): “Justizia ezin da izan botereak egia manipulatu eta errudunak babesten dituen antzeztokia”

2023ko urriaren 4an epaitu zituzten Silvia eta bera jipoitu zuen ertzaina / © Getxoko EH Bildu

2018an Silvia izeneko boliviar jatorrizko Algortako emakumea Neguriko komisarian jipoitzeagatik zigortutako ertzainaren defentsa Eusko Jaurlaritzak hartu zuen bere gain, Bingen Zupiria Segurtasun sailburuak aitortu duenez. Lakuak orain arte baieztatu ez arren, jakina zen. Nabarmenena da Zupiriak ezetsi egin duela aurrez Josu Erkoreka sailburu ohiak esana: Jaurlaritzak ez zuela prozesuan parte hartu. Bada, Aghata Libano Silviaren abokatuak azpimarratu du “behingoz” bost urte eta erdiz salatzen ibili dena baieztatu egin dela; “atestatua faltsutu, frogak sistematikoki zein nahita estali eta ikertu ez izana”, alegia. Hori dela eta, letraduaren ustez, “estalketa horretan inplikatutako bakoitzak kontuak eman” beharko lituzke. 

Eñaut eta Joseba Alvarez: “Adierazpen askatasuna ukatzen denean, Donostia Mozal Hiria bilakatzen da”

© Joseba Alvarez

2023ko San Sebastian bezperan Alde Zaharreko Plaza Berrian presoen etxeratzearen aldeko pankarta bat ipintzen saiatzeagatik, iazko maiatzean 750 euroko isun bana jaso zuten Joseba eta Eñaut Alvarez aita-seme donostiarrek. Horrez gainera, deklaratzera deitu zituzten. Bada, zigor eskaera jaso dute orain: urte eta erdikoa Eñautek eta bi urte eta erdikoa Josebak. Epaiketa egunaren zain daude. 

Subflubiala Ez! plataforma: "Lamiakoko ibai azpiko tunela: kalte ondorioak izango dituen obra"

Apirilaren 28ko bizikleta-martxa / © Subflubialari Ez! plataforma

Datorren larunbatean, irailak 21ean, Subflubiala EZ! Plataformakook kalera irtengo gara berriro. Oraingo honetan 12:00etan Artatza parkean hasiko den kanpaldi batekin. Azoka, musika, bertsolariak, ipuin kontalariak eta beste hainbat jarduera izango dira. Horren bidez, Lamiakoko ibai azpiko tunelaren zentzugabekeriaren berri eman eta partekatu nahi dugu. Izan ere, mugikortasun-arazoak konpondu beharrean, larriagotu egiten ditu tunel honek. 

Klaus Armbruster (Baskale elkartea): “Arrazakeria eta xenofobia ez daude faxisten ahotan bakarrik, demokratatzat jotzen dituzten askoren hitzetan ere badaude”

Klaus Armbruster arduratu da itzulpen-lanez / © Sare Antifaxista

Baskale elkarteagaz lankidetzan, Bernd Langer ekintzaile antifaxistaren “Antifaschistische Aktion. Geschichte einer linksradikalen Bewegung” (Ekintza antifaxista. Ezkerreko mugimendu erradikal baten historia) liburua argitaratu du Sare Antifaxistak, espainolez. Itzulpen-lanez arduratu den Klaus Armbrusterrek eman dizkigu lan horren xehetasunak. “Acción antifascista. Historia de un movimiento de izquierda radical” liburua 20 euroan (gehi bidalketa gastuak / Correoseko tarifa) eros daiteke e-posta (antifaxista.ekintza@gmail.com) edo Whatsapp bidez eskatuz. Horrez gainera, Itzubaltzeta/Romoko Casal liburudendan (Aurrezki Kutxa, 24) eskura daiteke.

Webgunea badauka Uribe Kostako Lantzean Behin komunikazio-egitasmoak

Azken ukituak eman ostean, gaur aurkeztu du bere bloga Lantzean Behin Uribe Kostako euskarazko komunikazio-egitasmoak. Noizbehinkari digital horretan, tokiko kazetaritza-proiektu xume honek tarteka-marteka plazaratu ohi dituen albiste luzeak eta elkarrizketak irakurtzeko aukera egongo da. Horrez gainera, herri-eragileek helarazitako argazkiak eta bideoak egongo dira ikusgai, webgunean bertan edo horretarako propio sortutako Flickr eta Youtube kanaletan. Kolektibo horien deialdiak eta jarduerak, berriz, Herri Panelean iragarriko dira. “Azken ordukoen” berri X (lehengo Twitter) eta Facebook sare sozialetan ematen segituko du Lantzean Behinek, bitarteko horien denen irudia eguneratu ostean. Instagram ere erabiliko du horretarako. Ondokoa da webgunearen helbidea: lantzeanbehin.blogspot.com

Palestinaren alde, Carrefourri boikota egitera deitu dute Uribe Kostako jai eta txosna-batzordeek

Berangoko Santa Ana jaietan egin zuten prentsaurrekoa / © Khalas! Palestina-Uribe Kosta

Herriko festetan ere Palestinaren aldeko elkartasuna gauzatzeko, Khalas! Palestina-Uribe Kosta taldeak abiatutako ekimenagaz bat egin dute dozena eta erdi jai-batzorde, txosna-batzorde, txosna eta elkartek. Hala, udaldi honetan Uribe Kostan zehar ospatuko diren jai eta ekitaldietan Palestinaren aldeko jarrera erakutsi eta Israel burutzen ari den genozidioa, garbiketa etnikoa eta apartheid salatuko dituzte. Horiek denek prentsaurrekoa egin zuten atzo, Berangoko Santa Ana jaietan. 

Arrazismoari aurre egin eta horren aurrean antolatzera deitu dute Algortan

Atzo aurkeztu zuten ekimena, agerralde baten bidez / © Ez Irentsi

Kalean zabaltzen ari diren jarrera eta diskurtso arrazisten kontrako erantzuna ematera eta horien aurrean antolatzera deitu dute Algortan. Bereziki, herriko gazteei egin diete borrokara batzeko deia, "Ez irentsi arrazakeriaren amua" lelopean.

“Gurea Euskal Selekzioa” dela aldarrikatu dute Algortan

 

Espainiako eta Ingalaterrako futbol-selekzioek jokatuko duten Eurokopako finalaren atarian, berrehun bat herritar batu dira Algortako Txiki-Otaegi plazan, “espainolak edo frantsesak ez” garela eta “gurea Euskal Selekzioa” dela aldarrikatzeko. Izan ere, “Euskal Selekzioaren ofizialtasuna ukatzen diguten horiek, kirolaren eta elkarbizitzaren argudioen bitartez, Espainiar selekzioaren agenda inposatu” gura digutela salatu dute deitzaileek, “gure herriak jasaten duen asimilazio nazionalean geroz eta gehiago sakonduz”. Ildo horretan, Euskal Herriak ere nazioarteko txapelketa ofizialetan parte hartzeko gogoa azaleratu dute. 

 

Otxantegiko epaituari 1.600 euro baino gehiagoko zigorra ipini diote

Maiatzaren 9an Otxantegiko herri-lurren desalojoa salatu zuten Berangon / © Otxantegi Herri Lurra

“Atentatua, desordena publikoak eta erresistentzia larria” leporatuta, Bilbon epaitu zuten martitzenean Otxantegiko (Berango) herri-lurrak hustu zituzten egunean Ertzaintzak atxilotutako laguna. Bada, ekintzaileek Sare Antifaxistari jakinarazi diotenez, epaia iritsi zaie jada: eguneko 6 euro ordaindu beharko ditu 9 hilabetez; 1.600 euro baino gehiago, alegia. Helegitea aurkezteko aukerak aztertuko dituzte. 

Otxantegiko epaituari elkartasuna adierazteagaz batera, “polizia-muntaiatzat” jo dute auzia

Epaitutako lagunari elkartasuna adierazi zioten / © Sare Antifaxista

Bilbon epaitu zuten atzo Otxantegiko (Berango) herri-lurrak hustu zituzten egunean Ertzaintzak atxilotutako laguna. Gazteari “atentatua, desordena publikoak eta erresistentzia larria” leporatzen dizkiote. Hala ere, akusazio horiek “polizia-muntaiatzat” jo dituzte bere kideek. Epaiaren zain dago orain. Hala ere, “gertatzen dena gertatzen dela, lurraren defentsan tinko” segituko dutela ohartarazi dute Otxantegikoek. Bitartean, epaitegiaren kanpoaldean, hainbat lagunek elkartasuna adierazi zioten epaitutako lagunari. 

 

Gizartearen presioak eragin omen du Segurtasun Sailak Silviaren auziaren akusazioa uztea

Silviari elkartasuna adierazteko elkarretaratzea Getxoko udaletxean / © Ecuadior Etxea

Naiz.eus agerkariak atzo zabaldu zuenez, 2018an Silvia izeneko boliviar jatorrizko Algortako emakumea Neguriko komisarian jipoitzeagatik zigortutako ertzainak auzitan jarraitzeari uko egitea ebatzi zuen ekainaren erdialdean. Dirudienez, Eusko Jaurlaritzaren Segurtasun Sailak defentsaren kostuak ordaintzen ez jarraitzeko erabakiagatik egin zuen atzera polizia-agenteak. Agatha Libano Silviaren abokatuak adierazi duenez, “gizartearen presioaren ondorioz” hartu zuen erabaki hori Segurtasun Sailak.

 

LGTBIQ+ Askapenaren Aurrean “jarrera penagarria” izatea egotzi dio Sare Antifaxistak Erandioko Udalari

Eragileek Erandioko udaletxearen aurrean egin dute elkarretaratzea / © Sare Antifaxista

Bariku honetan eman diete hasiera ekainaren 28ko Sexu Askapenerako Nazioarteko Egunaren harira Erandioko hainbat eragilek antolatutako ekitaldiei. Horren harira, “EAJren eskuetan” dagoen tokiko Udalari “jarrera penagarria” izatea leporatu dio Sare Antifaxistak. Gaur jarraituko dute ekitaldiek. 

Ekainaren 28a “kontsumorako festa” bilakatu gura izatea leporatu dio LGTBIQ+ mugimenduak Getxoko Udalari

© Getxoko Ahal Dugu 

Ukatu Uribe Kostako Asanblada Transmaribibolloak egindako deiari erantzunez, ehundaka herritarrek egin zuten manifestazioa atzo arrastian Algortako kaleetan zehar, Sexu Askapenerako Nazioarteko Egunaren aldarrikapenakaz bat eginez. Hain zuzen ere, E28a “eduki aldarrikatzaile eta politikoz hustu eta kontsumorako festa bilakatu” gura izatea egotzi zion Getxoko Udalari Ukatuk, eta erakunde publikoak antolatutako ekitaldiei boikota egitera deitu zuen. 

Subflubialaren kontrako asteburuko kanpaldia egingo dute irailean Artatzan

Ekainaren 15eko manifestazioa / © Subflubiala Ez plataforma

Subflubiala Ez plataforma herritarrak deituta, Getxo eta Portugalete lotuko dituen itsasadarraren azpiko errepidearen kontra kalera atera dira dozenaka eragile eta herritar, gaur arrastian. Bizkaiko Foru Aldundiak bultzatutako egitasmoak eragindako dituen kalteak zerrendatzeaz gainera, hurrengo mobilizazioaren berri eman dute antolatzaileek: irailaren 21ean hasita, aste-akabu osoan luzatuko den kanpaldia egingo dute Itzubaltzeta/Romoko Artatza parkean. “Kalera ateratzen jarraituko dugu proiektu hau gelditu arte”, ohartarazi dutenez. 

Gerra-garaiko bonbardaketak lez, memoria historikoa ahaztuta ei dauka Erandioko Udalak

Erandioko bonbardaketek eragindako biktimak gogoratu zituzten, Eduardo Renovalesen liburu-aurkezpenagaz batera / © Sare Antifaxista

1936ko gerran Erandio astindu zuten nazi-faxisten bonbardaketen 87. urtemuga gogoratzeko, Eduardo Renobales Martin (Zierbena, 1956) historialaria eta idazlea gonbidatu zuen Sare Antifaxistak, DaThorren tabernara. Bertan aurkeztu zuen eguen arrastian “Historia del Batallón Olabarri. Los nombres de la Libertad” liburua, gatazka armatuan borrokatu ziren EAE-ANVren unitate horri buruz berba egiten duena. Bada, ekitaldia baliatu gura izan zuen faxismoaren kontrako eragile memorialistak, orain artean Erandioko Udaletik igaro diren agintariek bonbardaketan eta horiek eragindako biktimak gogoratzeko ezertxo ere egin ez dutela salatzeko. Sare Antifaxistak memoria historikoa eta berau lantzen duten taldeak alde batera lagatzea egotzi die. 

Eduardo Renobales (historialaria): “EAE-ANVren gudari askok ez zuten bizi izandakoen lekukotasunik emateko aukerarik izan, inork eskatu ez zielako"

Liburuaren aurkezpena Erandion / © Sare Antifaxista

1937ko apirilaren 22tik 26ra bitartean, Erandio sutsuki eraso zuten Francoren zerbitzura zeuden Alemaniako nazien eta Italiako faxisten hegazkinek: horren eraginez, 29 hildako eta 37 zauritu egon ziren, Euzko Jaurlaritzaren Herrizaintza Sailak 1937ko ekainaren 9an jakinarazi zuenez. Horren akorduan, eguen honetan, ekainaren 13an, Erandion bertan, “Historia del Batallón Olabarri. Los nombres de la Libertad” liburua aurkeztuko du Eduardo Renobales Martin (Zierbena, 1956) historialariak eta idazleak. Hitzordua 19:00etan ipini du Sare Antifaxistak, Dathorren tabernan (San Inazio kalea). Hain zuzen ere, bi egun beranduago, hilaren 15ean (zapatuan), 87 urte beteko dira Francoren matxinoek Erandio hartu zutela. 

Eusko Abertzale Ekintzaren (EAE-ANV) Olabarri batailoiari buruz dihardu Renobalesen liburu berriak. Sare Antifaxistak argitaratutako lanean, 1936ko gerran zehar EAE-ANVren unitate hori osatu zuten 1.500 militante ekintzaileetatik 800en izenak batu ditu historialariak. Liburua e-posta bidez eros daiteke (antifaxista.ekintza@gmail.com), 15 euroan (gehi bidalketa-gastuak / Correosen tarifa). 

 

Sionisten konplizeak salatu dituzte Jaurlaritzaren Bilboko egoitza okupatuz

© Khalas! Palestina-Uribe Kosta

Eusko Jaurlaritzaren Bilboko egoitza okupatu du gaur arrastian Khalas Palestinaren aldeko Uribe Kostako elkartasun-taldeak EAEko gobernuak “Palestinaren okupazioagaz eta Gazako sarraskiagaz duen konplizitatea” salatzeko. Sionisten laguntzaile diren enpresak ere seinalatu dituzte; tartean, Areetan egoitza daukan Sener armagintza-enpresa.