Lokutorio-grebari ekin diote gaur Zaballako espetxean dauzkaten eskualdeko lau preso politikok

Zaballako espetxera egindako martxa baten artxibo-irudia / cc-by Hala Bedi

Azken hilabetean lokutorioetan suertatu diren matxurak direla eta, pazientzia agortu zaie Arabako Zaballa espetxean dauzkaten 13 euskal preso politikori. Besteak beste, Aitor Cotano algortarrak eta Orkatz, Lexuri eta Irantzu Gallastegi berangoztarrek lokutorio-grebari ekitea erabaki dute. Kartzelako zuzendaritzak matxura denak behingoz konpondu arte protestan segitzeko asmoa daukate, bisitak baldintza duinetan egin ahal ditzaten.

Argia agerkari digitalean argitaratutako gutunean adierazi dutenez,  Espainiako Estatuko espetxeetatik Euskal Herriratu zituztenetik, Zaballako espetxean "komunikazioaren alorrean gabezia ugari" topatu dituzte. "Aurrez aurreko gutxiago eta laburragoak dauzkagu, lokutorioko bisitak baldintza tekniko kaxkarretan gauzatu behar izan ditugu eta telefono deiei dagokienean ere, garestiegiak izateaz gain, gaizki kokatutako gailu zaharkitu eta matxuratuak erabili behar ditugu", zehaztu dutenez. 

Bitartean, espetxeko zuzendaritzak ez omen du ezertxo ere egin. Azken hilabeteko matxurei dagokienez, "asteotan behin eta berriz eskatu diogu espetxeari konpondu dezan. Alferrik. Aitzakia merkeak soilik eskaini dizkigu. Konponbiderik ez, ezta alternatibarik ere", kritikatu dutenez.

Aldarrikatu dutenez, "preso ororen oinarrizko eskubidea da bere hurkoekin harremana izatea, eta euskal preso politikook gainera herritarrekin lotura estua dugunez, funtsezkoa dugu. Harreman hori baldintza duinetan egin behar dugu eta ezin dugu onartu bisitak gauzatzea Zaballan dauzkagun baldintzetan".